مشروع الأشعة المنزلية فاشل؟ أسباب الفشل الحقيقية وإزاي تتصلّح

حكايتين متناقضتين

"مشروع فاشل، هصفّي وأبيع الجهاز برخص التراب" — جملة من زميل صرف هو وشريكه أكتر من نص مليون جنيه، غير أقساط شهرية تقطم الوسط. وفي نفس السوق، مركز أشعة منزلية شغال 24 ساعة بخمس أو ست أجهزة ومش ملاحق.

السبب الأول: السرعة

أهم حاجة في الأشعة المنزلية هي السرعة. لما أم تتصل وتقول ابني رجله اتكسرت، ويكون الرد "استنى لما أستأذن من شغلي وأجيلك"، دي أول مصيبة.

السبب الثاني: الشكل والمضمون

داخل تعمل أشعة متوسط سعرها حوالي ألف جنيه بلبس مبهدل وجهاز غالي متشال في حضنك؟ المريض في الغالب ما يعرفش قيمة جهازك؛ هو بيشوف الصورة اللي قدامه.

على الأقل: كوفر نظيف للجهاز، شكل مهني، وفيلم بجودة محترمة. ما تبوّظش الطبخة على شوية ملح — جهاز بمليون وفيلم رخيص؟

السبب الثالث: العملية البيعية كاملة

روحت بسرعة؟ في ميعادك؟ سلّمت الأشعة وبعتّها للدكتور على الواتساب؟ سألت محتاج أوضاع تانية ولا تقرير؟ السعر مناسب؟ أي تقصير في واحدة بيأثر على صورتك.

وما تقولش للمريض "مفيش تقرير" عشان توفّر أجر الأخصائي. التجربة الكاملة هي اللي بتجيب الحالات.